Skip to main content

CEC-USA Tuanbia

  • Chin Evangelical Churches USA cu a hramthawk ah Mid-America Chin Christian Fellowship in a rak i thawkmi a si. MACCF cu December 19, 2009 kum ah Khrihfabu(13) fonh in rak thawkmi hawikomhnak bu a si. Cu hawikomhnak bu rak thawknak aruang bik cu Mid-West area ah khuasami hna nih ngaihchiatnak an tontik ah zohkhenhtu an rak ngei lo. Cu lio ahcun Khrihfabu zong tha tein in a dirmi an tlawm rih. Pehtlaihnak tha zong an rak ngeih khawh lo tik ah harnak tampi an rak tong. Cu harnak an tonmi raldoh ding ah Khrihfabu hawikomhnak bu an rak thawknak a si. Cu hawikomhnak bu  tuah hnu ahcun chiatni/thatni tawn caan ah kan miphun hna a rak ngam ngaingai cang. Cu hawikomhnakbu hmang in Pathian thangthatnak le lentecelhnak in Khrihfabu pakhat le khat hawikomhnak rak ngeih a si. 
  • 2014 kum thawk in CBCUSA he riantuan tinak rak ngeih a si i Khrihfabu nih kumkhat hmuhmi 3% cu CBCUSA ah rak peknak in pehtlaihnak rak tuah a si. Mission riantuannak cu mission department, CBCUSA ah rak tuan ti a si i mah le local church cio in rak tuan a si. Sihmanhsehlaw can rak kal lengmang tik ah pehtlaihnak kong hi khat le khat lei in harnak tete arak um ve tik ah MACCF hawikomhnak bu cu amah tein riantuan thawk ve ding in timhtuahnak rak ngeih a si tik ah a min zong thlen siseh tiah ruahnak a rak chuak. Chin Evangelical Churches USA tiah min pekmi cu September 3,2021 General Assembly Meeting, Milwaukee khua ah rak thlen a si. Cu meeting lio ahcun CECUSA nih mission riantuan ve ding in timhtuahnak rak ngeih a si. CECUSA nih aihmaitlakmi mission field Asho Chin kan miphun hawi sin ah tuan ding ah hnatlaknak rak tuah a si. CECUSA nih Asho chinmi sin ah mission riantuan ai timhnak a ruang bik cu Asho Chinmi cu kawlram, miphun dang sin ah khuasami an si. Rev. Arthur E. Carson le Laura Carson nih 1888 ah American missionary in Ashco Chin sin ah mission riantuan an rak thawk cang. Mission center ah an rak sermi khuacu Thatyetmyo a si. Kum (9) hrawng mission rian an tuan hnu ah February 2,1899 ah Thayetmyo cu an chuahtak i tlangcung Chinmi phun sin ah thawngtha chim ding in an rak i thawh. Hakha an phak ni cu March 15, 1899 ah a si. Rev. Carson le Laura hi kan miphun caah Pathian nih arfi bantuk in kan miphun caah ceunak thawngtha a rak kan phurhtu hmasak bik an si. 
  • Kan miphun sin Rev. Carson le Laura nih Jesuh khamhnak le dawtnak thawngtha an chim kum in a tu cu 123 kan si si ve cang. Tlangcung Chinmi phun cu a tam deuh Khrihfabu kan si nain thawngtha a rak thei hmasami Asho Chin hna cu biaknak karcehmi an si tik ah Khrihfabu an tlawm ngaingai rih. Khrihfa a si ciami hmanh an mah tein a dir kholomi tampi an um rih. Cu kan miphun hawi sin ahcun CECUSA nih thawngchimnak, cawnpiaknak le ngandamnak lei kong he i hmaitlak in tuan ai tim cuahmah ko. Bawipa nih CECUSA thluachuah pe ko seh!