Chin Evangelical Churches USA cu a hramthawk ah Mid-America Chin Christian Fellowship (MACCF) tiin a rak i thawkmi a si. MACCF cu December 19, 2009 kum ah Khrihfabu (12) fonh in rak thawkmi hawikomhnak bu a rak si. Cu hawikomhnak bu rak thawknak aruang bik cu Mid-West Area ah khuasami hna nih ngaihchiatnak an ton tikah zohkhenhtu an rak ngei lo. Cu lio ahcun Khrihfabu zong tha tein in a dirmi an rak tlawm rih. Pehtlaihnak tha zong an rak ngeih khawh lo tikah harnak tampi an rak tong. Cu harnak an tonmi raldoh dingah Khrihfabu hawikomhnak bu an rak thawknak a si. Cu hawikomhnak bu tuah hnu ah cun chiatni/thatni ton caan ah hna a rak ngam ngaingai cang. Cu hawikomhnakbu hmang in Pathian thangthatnak le lentecelhnak in Khrihfabu pakhat le pakhat hawikomhnak rak ngeih a si. 

Kum 2014 thawk in Chin Baptist Church USA (CBCUSA) he riantuan tinak rak ngeih a si i Khrihfabu nih kumkhat hmuhmi chungin CBCUSA ah 3% pek in pehtlaihnak rak tuah a si. Mission riantuannak cu Mission Department, CBCUSA he rak tuan ti a si i mah le local church cio in tuan a si. Sihmanhsehlaw caan a kal lengmang tikah pehtlaihnak kong pehtlai in kaphnih karlak ah harnak tete a rak um caah MACCF cu amah tein riantuan thawk ve dingin timhtuahnak rak ngeih a si. A min zong thlen siseh tiah ruahnak a rak chuak i Septermber 3, 2021 General Assembly, Milwaukee khua ah Chin Evangelical Churches USA (CECUSA) tiah a min thlen a si. Cu meeting lio ah cun CECUSA nih amah tein mission riantuannak hmunhma kawl le tuan ding in timhtuahnak rak ngeih a si. CECUSA nih a hmaitlakmi mission field cu kan miphun hawi a simi Asho Chin hna sinah tuan dingah hnatlaknak rak tuah a si. CECUSA nih Asho Chin mi sinah mission riantuan a timhnak a ruang bik cu Asho Chin mi cu Kawlram, miphun dang sinah khuasami an si. Rev. Arthur E. Carson le Laura Carson nih 1888 ah American Baptist missionary in Asho Chin sinah mission riantuan an rak thawk cang. Mission center ah an rak sermi khua cu Thayetmyo a si. Kum 9 hrawng mission rian an tuan hnu February 2, 1899 ah Thayetmyo cu an chuah tak i tlangcung Chinmi sinah thawngtha chim ding in an rak i thawh. March 15, 1899 ah Hakha khua an rak phan. Carson le Laura hi kan miphun caah Pathian nih arfi bantukin ceunak thawngtha a rak kan phurhtu hmasak bik an si. 

Kan miphun sinah Rev. Carson le Laura nih Jesuh khamhnak le dawtnak thawngtha an chim kum in atu cu kum 123 kan si si ve cang. Tlangcung Chinmi cu a tam deuh Khrihfa kan si nain thawngtha a rak thei hmasami Asho Chin hna tu cu biaknak karcehmi an si tikah Khrihfa an tlawm ngaingai rih. Khrihfa a si ciami hmanh anmah tein a dir kho lomi tampi an um rih. Cu kan miphun hawi sinah cun CECUSA nih thawngtha chimnak, cawnpiaknak le ngandamnak lei kong he i hmaitlak in mission rian tuan a tim cuahmah. Bawipa nih CECUSA thluachuah pe ko seh!