Chin Evangelical Churches USA

Chin Evangelical Churches USA in kan in don hna. CECUSA bukbau nan len caah kan i lawm tuk. Khrihfabu kip fonhn in Pathian ram caah le miphun caah Pathian nih a hmanmi bu riantuannak zong a si. CECUSA cu buu thleidannak um loin Jesuh Khrih Thawngtha chim ai hmaitlakmi a si. CECUSA cu (inter - denominational) a si. Mission riantuannak ah thazang fonh in riantuanti a duhmi bu a si fawn. 

Local Church khuakhannak upat in riantuanmi bu a si. Pathian riantuan ah nu le pa thleidannak um lo in riantuanmi bu a si. Thawngtha bia a karh khawhnak ding ah zumhnak le hruainak ai khatmi bu he riantuan ti a duhmi a si. CECUSA nih ai hmaitlakmi hna cu (1) kan miphun chung in zumhnak ah a tlaumi kawl ding (2) Chungtel Khrihfabu thinlung, taksa, thlarau ah a dammi bu si ding (3) miphun damnak le luatnak caah tuan ding a si.

CECUSA tuchun ni tiang a kal khawhmi hi Pathian nih thluachuah a pek i lawm a hruai caah a si. Cu pin ah chungtel Khrihfabu hna nih thlacamnak in siseh, chawva in siseh nan dirhkamh caah Pathian rian a tuan khomi a si. Pathian rian cu Pathian duhnak in tuan a si ko nain a riantuantu ding ah Khrihfabu a hman, a sermi minung hna a hman tawn hna. 

USA ram ah Khrihfabu hi bantuk  in kan um khawhmi le Pathian riantuan kan tuan khawhmi cu American Baptist Missionary Rev. Arthur E. Carson le Laura hna nih March 15,1899 kum ah an rak phan i Thawngtha an kan chimh, nunning le thanchonak a lam kip in kan kan cawnpiakmi tlaici cu a nung i a thang tinak a si. Rev. Carson laitlang a phak kum in a tu cu kum 123 leng a hung si cang. Rev. Carson le Laura an chuahkehnak ram USA ah Chin Khrihfabu Pathian nih a dirhmi cu tuanbia dawh a si. Kan miphun Khrihfabu tuanbia ah philh awk a thalomi a si fawn tiah ka ruah. Bawipa nih nan dihlak thluachuah in pe ko hna seh.