Mid-America Chin Christian Fellowship (MACCF) cu Chin Evangelical Churches (CEC-USA) tiin September 9,2021, general meeting ah a min thlen a si. MACCF cu December 19,2009 kum ah Khrihfabu (13) fonh in hawikomhnak bu rak dirhmi a si. Cu hawikomhnak a rak dirnak aruang cu Mid-West area ah khuasami kan miphun riantuannak hmun ah a ummi hna nih ngeihchiatnak an ton tik ah zohkhenhnak kong ah harnak an rak ton caah. Hi hawikomhnak bu hi rak ser a si. Cu ticun Khrihfabu pakhat le pakhat pehtlaihnak an rak tuah tik ah ngaihchiatnak le lunglawmhnak an ton caan ah an rak i hrawm hna.  2004 kum ah CBCUSA cu rak dirh a si ve. Chinmi holh khat a hmangmi a dang in um cu a si kho lai lo hmun khat ah riantuanti ko hna u sih tiah sawmnak a rak um tik ah 2014 kum ah CBCUSA he 3% (percent) rak pek a si. Mission riantuannak cu local church nih thiam ning cio rak tuan cio a si.

Kum (12) chung hawikomhnak bu in ai hruaimi cu hawikomhnak a fehchin lengmang tik ah ramchung, ramleng mission riantuannak kauh deuh a herh ko tiah ruah a si tik ah fellowship cu Churches in thlen a si.

Chin Evangelical Churches cu Baptist Khrihfabu kip fonh in riantuanmi bu kan si. Mission rian ah zumhnak ai khatmi  bu kip fonh in riantuannak bu a si. ECCUSA cu Inter-denominational a si. CEC-USA abia pi in ai hmaitlakmi cu Mission riantuannak thawn ter a si. Kan Bawipa Jesuh fialmi “Khuazakip ah va kal u law miphun vialte kha ka zultu ah va ser hna u; Pa le Fapa le Thiang Thlarau min in tipilnak va peh hna uh.”(Matt.28:19) tiah felmi rian pehzulh hi a si. CECUSA nih mission rian pehzulh in tuan ai thimmi cu Asho Chin kan miphun hna   sin ah a si.

Rev. Arthur E Carson le Laura Carson cu 1888 ah American missionary in Asho Chin sin ah an rak phan. An phaknak khua a hmasa bik cu Thatyetmyo a si. A hmasa bik Chin Mission an rak thawknak hmun a si. Kum (9) chung Asho Chin sin ah Mission rian an tuan hnu ah Feb. 2, 1899 ah Thayetmyo an chuah tak i Hakha khua an phak cu March 15,1899 ah a si. Rev. Carson le Laura cu tlarau lei ah a tlaumi Chinmi phun khamh ding ah kan kawl tu an si. Rev. Carson keneh zul in Asho Chin nih Jesuh Khrih cu Pathian a si tiah an zumhnak ding ah hmaitlak in mission rian tuan ding a si.  CECUSA cu kan miphun taksa, thinlung le thlarau lei ah kan luat i kan damnak ding ah riantuanmi bu a si lai.

Statement of Faith

1. Baibal (The Scriptures)
   “Baibal (66) cu Pathian bia a si. Pathian thaw chuahhnawhmi a si. PathianThlarau hruainak le fimnak in tialmi a si caah palhnak a ngei lomi a si. Khrihfabu ah nawlngeihnak sang bik a ngeimi a si.( 2Tim. 3:16-17; 2Pet.1:19-21;3:1-2; 16; Jhn. 10:35)
2. God (Pathian)
   “Pathian pakhat lawng a um. Pathian cu zeizongthil sertu,  zeizong hngaltu, a thiangmi, a tlingmi, zungzalnungmi, dawtnak le vel in a khatmi a si. Pa, Fapa le Thiang Tlarau in ai langh i riantuanmi(thum komh Pathian) a si.( Ex. 15:11; Isa. 45:5-6;  Gen. 1:26; Mtt. 3:16-17, 28:19)
3. Minung(Human being)
   “Minung cu Pathian mui in sermi kan si. Pathian duhnak tuah ding ah sermi kan si. Nawlngaih lo sual ruang ah Pathian he pehtleihnak a cat. Minung hi Pathian nih Amah sunparnak petu ding ah sermi kan si. Minung hi Pathian nih zungzal nunnak pek ding ah a kan kawlmi kan si. Nu le pa sinak (sex) cu Pathian pekmi a si caah thitumhnak tuah hnu ah hman ding a si. Nu le Nu pa le sualnak ((lesbianism, homosexuality form of marriage) thitumhnak cu Pathian bia he ai ralchanhmi a si caah zumtu nih tuah lo ding.” (Gen. 1:26-27,31; Matt. 19:4; I Kor. 11:7; Gen. 3:1-24; Rom 5:12; Rom 3:23; Rom 6:23; Rom. 5:10; Lam. 17:26; Isa. 43:1-7; I Kor. 6:19-20; Rom 1:26-29; I Cor. 5:1; 6:9; I Thess. 4:1-8; Heb. 13:4; Rom. 7:2; I Cor. 7:10; Eph. 5:22-23)
4. Holy Spirit (Thiang Thlarau)
   “Thiang Thlarau cu Pathian sinak thlamtling a ngeimi a si. Thiang Thlarau cu minung kan herhnak zawn ah bawmtu a si. Thlarau laksawng cu zumtu dihlak sin ah pek a si. Cu laksawng cu Pathian sunparnak le  Khrihfabu thanchonak caah pekmi a si. ( Jhn. 14:16-17; Rom 12:3-8; I Kor. 12:1-11; I Kor. 14:1-39; IPet. 4:11; Efes. 4:11)
5. Pathian khamhnak (God’s Salvation)
   Pathian nih khamhnak mi cu Jesuh zumhnak le velngeihnak thawng in a si. Minung tuahsernak khamhnak caah si lo in zumtu nih Pathian rian tuannak ah tuahnak in langhter ding a si.(Jhn. 3:16; Jhn. 6:29; II Thes. 1:8; Rom 10:9,16; Rom 6:17; Efe.2:8; I Tim. 2:3-4; Rom 1:16; Rom 10:14-17; Jhn. 14:6; Rom 5:8; Lam. 16:31; Lam. 2:38; Lam.3:19; Lam. 16:14; Jeim 2:26).
6. Khrihfabu(Church)
   Khrihfabu cu Jesuh Khrih cu khamhtu le Pathian ah ai lak i a zummi dihlak an si. Khrihfabu cu vawlei cung(universal church) dihlak zumtu hna le hmun pakhat ah ai pummi(local church ) Khrihfabu ti in phun hnih a um. Khrihfabu cu tipil innak le Bawipa zanriah(the two ordinances)  a hmangmi kan si. Khamhnak a hmu cangmi hna nih tuah dingmi a si. Jesuh Thawhthan Ni(Bawipa Ni) cu Pathian Biak le thangthatnak ah kan hman. (Matt. 16:18; Lam. 2:47; Rom 12:3-5; Eph. 1:22-23; 5:23,30; I Cor. 6:15; 12:12-27; Col.2:18-19; Heb. 10:25; Matt. 28:19-20; I Pet. 1:22; Gen. 2:2; Isa. 58:13-14; Neh. 13:15-22; Matt. 12:5, 10-13; Mark 2:23-28; Jhn. 20:1; Bia. 1:10; Lam. 20:7; I Cor. 16:2)
7. Brief Statement of Faith
   Chin Evangelical Churches, USA zumhnak tlaihleng cu Baibal chirhchan le Protestant zumhnak hram pi chirhchan in a chuakmi a si. Baibal hi zumhnak hrampi a si(The Supreme Authority of the Bible) Biaknak le uknak then ding (Separation of Church and State; Ref. Mat.22:21) Khrihfabu bing nawlngaihnak(Autonomy of the Local Church) Zumtu Poah Thlangbawi an si dih(Priesthood of All Believerse) Zumtu lawng tipilnak pek ding(Believers’ baptism) Khrihfabu zalonnak(Christian Liberty) Ref: Rev. Sang Awr nih Baptist tuanbia le zumhnak a tialmi cauk page 318 chirhchanmi a si.

Ref: Rev. Sang Awr nih Baptist tuanbia le zumhnak a tialmi cauk page 318 chirhchanmi a si.